Elvira Solèr Althof (8-02-1977)

Suenter mia affonza ed il temps da scola a Valendau hai jeu absolviu in emprendissadi sco conditra-confisiera a Cuera. Silsuenter sun jeu stada en plirs menaschis ell’entira Svizra per emprender e perfecziunar mia savida. Entginas stagiuns da patissiera hai jeu denter auter passentau ella Casa Berno el Tessin, el Waldhotel Arosa, el Hotel Mirabeau a Zermatt, el Hotel Des Alpes a Flem ed el Hotel Duc de Rohan a Cuera. Suenter hai jeu luvrau tschun onns sco conditra-confisiera ella Pasticceria Marnin a Locarno. Naven digl onn 2011 havein Matthias ed jeu menau il Ristorante Tentazioni a Cavigliano, pli tard l’Osteria dell’Enoteca a Losone. Nies temps liber passentein nus ensemen cun nossa feglia Elisa ch’ei naschida il 2006. A propos annada, il vin ei in da mes hobis, gest sco il magliar.

Matthias Althof (17-10-1966)

Jeu sun carschius si a Blomberg/Lippe a Nordrhein-Westfalen. Suenter la scola mercantila superiura hai jeu entschiet mia carriera da cuschinier el Jagdrestaurant Grünental. Mia via ha menau mei gia baul en enconuschents menaschis tessines ed igl unviern el Hotel Schatzalp a Tavau, el Hotel Des Alpes ad Arosa sco era sin bastiments da cruschera dalla Royal Viking Queen. Staziuns da renum el Tessin ein denter auter stai igl Albergo Losone, Castello del Sole, Giardino, Reber e Belvedere, avon che jeu sun s’engaschaus duront diesch onns sco schef da cuschina el Castello Seeschloss ad Ascona. Il pass all’independenza hai jeu fatg ensemen cun Elvira igl onn 2011: nus havein surpriu il Ristorante Tentazioni a Cavigliano, nua che nus essan vegni titulai il 2012 cun 15 puncts da Gault Millau sco «la scuvretga digl onn». Il 2013 havein nus midau ell’Osteria dell’Enoteca a Losone, nua che nus essan vegni valitai cun 14 puncts da Gault Millau. Sche Elvira e nossa feglia Elisa ein cuntentas, sun era jeu leds. Ultra da quei fetschel jeu bugen viadis ell’Italia, enquerel ed emprovel bugen ora novas ideas, emprendel bugen d’enconuscher nova glieud e secapescha cuschinel, magliel e beibel jeu da narr bugen.