Davos igl albiert «Gasthaus am Brunnen» stat la Fundaziun Valendau Impuls

La Fundaziun Valendau Impuls ei vegnida instradada dall’uniun «Valendau Impuls» igl onn 2007. Ella s’engascha dapi sia fundaziun ils 4 da settember 2004 cun activitads concretas per in svilup persistent dil pign vitg muntagnard Valendau ch’ei unics grazia al maletg dil vitg historic intact e sia posiziun geografica attractiva amiez la Ruinaulta ch’ei enconuschenta pervia da sia cuntrada magnifica e sco paradis da viandar ed ir cun velo e canu.

La fundaziun ei seconstituida ils 20 da november 2007 ed ha entschiet il medem onn cun sias activitads. Ella vul contribuir al manteniment ed all’utilisaziun dad edifecis e spazis libers el vitg muntagnard da Valendau (vischnaunca da Val Stussavgia) ch’ein digns da vegnir protegi e manteni. Aschia gida ella a salvar ed augmentar il beinstar cultural, social ed economic da Valendau e da sia populaziun. Egl interess da Valendau e da sia populaziun sa la fundaziun era sustener activitads culturalas ella regiun. La fundaziun ha negin intent da realisar gudogn.
Igl emprem project dalla fundaziun vul – sco project per igl agid a sesez dalla pintga vischnaunca muntagnarda da Valendau – renovar e reanimar igl aschinumnau «Engihuus» ch’ei situaus central al plaz dil vitg historic cun la pli gronda fontauna da lenn dall’Europa.

Igl onn 2009 ha la vischnaunca regalau la casa da 500 onns alla fundaziun sut la cundiziun d’endrizzar e menar en quei baghetg in’ustria dil vitg ed ina sala communala da grondezia mesauna. Igl «Engihuus» duei vegnir renovaus e transformaus en in liug da sentupada per la populaziun e per hosps da dalunsch e damaneivel e remplazzar igl albiert existent situaus gest visavi che ademplescha buca pli las spetgas dad oz.

La fundaziun vul concepir igl «Engihuus» sco liug da sentupada per indigens e hosps cun ustria dil vitg, restaurant, sala e siat combras da hotel fetg specialas e sco punct d’informaziun per Valendau e la Ruinaulta. Sco albiert attractiv influenzau dalla regiun duei el intermediar impuls per il svilup en l’entira regiun.

Quei duei succeder cunzun cun

  • crear valur aschuntada per ils habitonts dil vitg
  • mantener ed utilisar monuments architectonics
  • render enconuschenta ina cuntrada unica

La fundaziun Valendau Impuls ei vegnida fundada tenor plan e dretg formal ils 21 da zercladur 2011 a Cuera. L’inscripziun el register da commerci ei vegnida publicada ils 29 da zercladur 2011 (FUSC nr.124 p.15).

Cusseglieras e cussegliers da fundaziun

  • Martin Pfisterer, dr. iur., president Fundaziun Valendau, Berna/Valendau
  • Walter Marchion, meinafatschenta Fundaziun Valendau, Valendau
  • Sep Cathomas, architect, anteriur cusseglier naziunal, president Regiun Surselva, Breil
  • Jürg Ragettli, dipl. arch. ETH/SIA, anteriur president Ligia grischuna per la protecziun dalla patria, Cuera
  • Lukas Ott, lic. fil. I, sociolog, president Pro Safiental, Liestal
  • Benedikt Bühler, anteriur president communal da Valendau, Valendau
  • Marc Woodtli, manager da products Flims Laax Falera, Flem
  • Hanspeter Brunner-Thöny, pur, representant dall’agricultura, Valendau
  • Hans Rudolf Luzi, hotelier, Hotel Weisses Kreuz, Spligia
  • Regula Ragettli, casarina e guida da museum, Valendau
  • Ludmila Seifert, lic. fil. I, meinafatschenta Ligia grischuna per la protecziun dalla patria, Cuera